Heyrst hefur að skrif mín hér þyki nokkuð súr á köflum og lítið upplýsandi. Því vil ég fræða fólk um það að ég er flutt til Íslands og bý nú með ástarmaka mínum á Hverfisgötunni í hinni nýju og litríku íbúð. Þar hyggst ég verja næstu mánuðum í lokaverkefnavinnu sem er ennþá á frumstigi. Málningar og litavinnunni er þó ekki lokið enn og margt af fallegum hlutum verma ennþá kassa í stofunni. Það er samt gott að eiga nýtt heima sem er meira að segja heima heima (nú á ég bara eitt heima en ekki þrjú sem er mikill léttir - tja kannski eitt og hálft).

Þá vitið þið það.

Litablogg

Gulur og hvítur og fjólublár og blár og málarahvítur - þetta eru allt fallegir litir í heimilislitrófinu á Hverfisgötunni. Litirnir sem gefa lífi mínu lit er ég sit og les og reyni að finna út úr því hvað í ósköpunum ég geti nú skrifað heila mastersritgerð um. Ekki skemma fyrir sterkfagurbleiku rúmfötin nýju sem gæða litrófið ákveðinni dýpt og gleðja augun þegar tekin er hvíld frá amstrinu. Bleiki liturinn harmónerar líka vel við dauffjólubláa gluggavegginn í svefnherberginu.

Lifum lífinu í lit.

Flutningsundirbúningur hafinn

Þá er komið að því. Flutningsundirbúningur er formlega hafinn. Í dag kom ég 20 flyttekössum í hús. Sagði sölumanninum hátíðlega að ég ætlaði að fá 20 kassa, spurði svo hvort hann héldi að ég gæti borið þá alla sjálf. Hann svaraði - hvis du er motiveret - Það vantaði ekki mótivasjónina en ég ákvað þó að fara tvær ferðir. Það var meira en að segja það að halda á þessum ferlíkum heim. Ég prófaði að hafa þá á höfðinu og hvaðeina, var fegin hjálpinni þegar ég fékk Steinunni nágranna með mér til að sækja seinni posjónina. Nú er hins vega ekkert sem hamlar því að fara að setja ofaní kassa. Hvað á að fara með? Hvað á að verða eftir? Reyni að grisja ruslið frá gersemunum. En þetta er allt svo ómissandi...eldhúsborðið sem fannst í ruslinu en er svo design, rúmið sem er yndislega stórt, allar bækurnar sem ég náði ekki alveg að klára í skólanum en hef mjög fögur fyrirheit um að gera góð skil í frístundum í framtíðinni.

-Tilgangur lífsins-

Tilgangur lífsins? Hvernig get ég verið ein inn í mér, ein inni í hausnum á mér. Og enginn annar kemst þangað – hversu mikið sem ég vildi leyfa það. Hvernig getur annað fólk verið með samskonar sjálf og ég – án þess að ég muni nokkurn tímann fá að skyggnast inn í hausinn á því. Hvað er ég? Hvað verður um sjálfið mitt þegar ég dey? Verður sjálfið mitt einn stór og ruglingslegur draumur? Af hverju geri ég allt sem ég geri? Af hverju finnst mér mikilvægt að ganga í skóla? Til að geta lifað betra lífi – seinna? Hvað með núið? Hvenær kemur seinna-ið? Það kemur aldrei. Ég lifi alltaf í núinu. Ég hlýt að ganga í skóla til að njóta núsins – til að njóta þess sem það gefur mér að læra. Af hverju ætti ég annars að hafa fyrir því? Ég hlýt að sækja um vinnu til að njóta þess á hverjum degi að gera eitthvað sem ég veit að ég geri vel – eitthvað sem gefur mér lífsgildi – á meðan á því stendur. Af hverju ætti ég annars að gera það – til að ég verði hamingjusamari seinna? Tilgangur lífsins hlýtur einfaldlega að vera að lifa í núinu - að njóta þess sem gerist núna – því seinna-ið kemur aldrei.

Ætli maður viti að maður hefur verið of lengi að læra einn á bókasafninu þegar svona hugsanir leita á mann á laugardagskvöldi?

Viðskiptahornið

Ég rakst á alveg ótrúlega áhugavert blogg í gærkvöldi, ætlaði varla að geta slitið mig frá því til að fara að sofa þó klukkan væri að ganga tvö og skóli klukkan 8. Deili því hér með með ykkur sem hafið áhuga á að fræðast um viðskiptamódel, hugleiðingar um stjórnun, stefnumótun, nýsköpun og álíka nördaskap http://business-model-design.blogspot.com/. Höfundurinn er ráðgjafi á á sviði stjórnunar og stefnumótunar og deilir með lesendum hugleiðingum sínum og áhugaefnum. Setur fræðin í skemmtilegan og auðlesanlegan búning. Hver hefur ekki gaman að þessu? Maður spyr sig...

Tek sjálfa mig á sálfræðinni...

Jæja, nú nenni ég ekki þessari sjálfsvorkunn lengur. Nú er um að gera að bretta hendur fram úr ermum, kafa lengst upp að öxlum, klípa í löngutöng og bókstaflega þvinga hendina út úr fjárans erminni. Já og HANANÚ. Er það ekki bara á gætt plan! Ætli það fáist útúrermihandaþvingari í Silvan eða Húsasmiðjunni kannski? Það væri nú vert að athuga það - kannski ég gæti orðið rík á þessari hugmynd. Það er nefnilega einmanalegt og erfitt verkefni að koma sér af stað í lokaverkefnavinnu. Mikil áskorun skal ég segja ykkur. Þess vegna hef ég ákveðið, bara akkúrat í dag, að ég ætli að (reyna að) HÆTTA að horfa skelfingaraugum á komandi mánuði. Þess í stað mun jákvæðni ríkja í sál minni og huga og hjarta og gleði og hamingja og eftirvænting fær að koma í stað hræðslu og hryllings. Já GLEÐI og EFTIRVÆNTING!!!!!!!! Það er SPENNANDI og GAMAN að FÁ að vinna lokaverkefni, fá að einbeita sér að ákveðnu verkefni í langan langan tíma og sökkva sér ofan í það og bara það og ekkert annað. Það er GAMAN! Ég er GLÖÐ og SPENNT og MÓTIVERUÐ og það er GAMAN!




Þeir sem verða varir við önnur viðhorf í fari mínu á næstu mánuðum mega gjarnan minna mig á þetta blogg.

Ein ég sit og sauma....

AAAaaaaaaaalein.

Vorkennið mér núna.

Takk.

Strákarnir MÍNIR

Ó Ó Ó vÓÓÓÓ
Hvílík spenna! Hvílíkur ÆSINGUR! Stelpurnar voru að fara á límingunni og þar með talin ég! Vóóóóóóóó.... og Alfreð Gísla maður! Hvílíkt hönk með hendurnar upp í loft og tunguna frammi í gómi! Við vorum alveg að vinna þetta maður! Ég og Robbi og Óli Stef.... við vorum að taka þetta! Sáuð þið snúningsmarkið hjá Robba í fyrri hálfleik? Ég kennd´onum´etta. Geðveikur leikur, geðveik spenna. Mér gæti bara ekki verið meira sama hvort við komumst í fimmta sætið eða ekki núna, ekki á þessari stundu. Ó mæ gooooooood skilurðu.

Stelpuhandboltakvöld þar sem höndum var klappað og fótum stappað. Svo ótt og títt að nágranninn á neðri sá sig tilneyddan til að nota kústinn til að banka upp í okkur á móti. Vóóó maður. Strákarnir OKKAR stóðu sig vel. Gæti vart verið stoltari af þeim. Glitruðu tár á hvörmum í stofunni er við hlustuðum á rúv eftir útsendingu og heyrðum í þeim vonsviknum og brotnum. Og Ulrich tapar sko geðveikt í hver-er-sætasti-þjálfarinn-keppninni!!!!!!!! Já púúúú.

Áfram Pólland!

Bíó

Hafið þið einhvern tímann lent í því að það standi enginn upp eftir að myndin í bíó er búin fyrr en löngu eftir að skroll-listinn er búinn og tónlistin og allt slökkt, af því að allir sem voru að horfa á myndina eru svo uppteknir af að ræða plottið í henni og velta fyrir sér hvað hafi í raun og veru gerst að þeir bara beinlínis gleyma því að fara úr bíóinu? Ég lenti í því í kvöld. Magnað.

Og fyrir valinu varð......daddaradddarææææ.....

We come from the land of the ice and snow, From the midnight sun where the hot springs blow.

Ohhh baby please take me hoooooooome.....

Já lesendur góðir - rokk og ról - we are on our way to ICELAND

Ísland ó Ísland, landið sem hefur okkur alið
og er okkur í hjarta falið
þar hafa tær okkar kalið.


Yfir og út

Ó mæ god Ó mæ god

Ísland eða Danmörk - það er stóra spurningin!

Hvað finnst þér?

p.s. gleðilegt ár Hilla!

Gleðileg jól allir saman...

Í kvöld var kveikt á jólaljósunum í Búdó. Á morgun fer ég til Óla.

Argggg

Djísús kræst maður hvað ég er að krebera á rational choice kúrsinum mínum. Er að fara í próf á morgun og er búin að eyða heilli helgi í að reyna að fá mig til að læra. Verstu afköst og mesta tímaeyðsla ever.....alveg þokkalega ekki rational choice að nota tímann í þetta!!!

Þurfti bara aðeins að fá að rasa út....

Ferðaárið 2006

Fyrir löngu síðan sagði Óli þessi spöku orð: "Ég hef það á tilfinningunni að þetta verði mikið ferðaár" Og gott ef hann hafði ekki rétt fyrir sér.

Að baki liggur Jótlandsferð (sem er eiginlega útland því þeir tala svo illskiljanlega þarna á Jótlandi), Íslandsferð, Californíuferð, önnur Íslandsferð og flug heim til Danmerkur, Búdapestferð, helgarferð til Köben, Ólaferð til Búdó og ferðalag til Eger. Á fimmtudaginn ætla ég að fljúga til Köben á ný og vera í sex daga, þá förum við Óli saman til Búdó og nokkrum dögum seinna til Vínar. Ég flýg svo til Köben þann 17.des og til Íslands daginn eftir. Margir tímar að baki í flugvélum og bílum og margar góðar minningar í pokahorninu, enn fleiri flugtímar framundan og gleðilegir endurfundir.

Kannski Óli ætti að sækja um hjá Vikunni eða DV að vera Völvan í ár...

vóóóó ég er svo kreisssí og spontant....

allt ad gerast 

motmaelendur 

oeirdaloggan uppstillt med trukk in fararbroddi sem sidar sprautadi gasi og vatni a lydinn 

riot loggan dreifdi mannfjoldanum med taragasi, vatni og gummibyssuskotum