Heklað hálsmen...jólagjöfin í ár?

Þetta gamla fólk nú til dags!

Jibbíkóla!


Jahá það er orð dagsins!

Andlausir dagar.
Hvernig er hægt að sitja og anda en vera samt algjörlega andlaus.
Maður spyr sig.

Kannski jógaöndun sé málið.
Andabrauð eða Andrés Önd?
Er andi í glasinu?
Á hvern ertu að anda?

Öndunarörðugleikar andanna í Andabæ.


Ég ætti kannski að panta mér tíma einhvers staðar.

Maðurinn er svo óskaplega lítill...

...þegar maður horfir á hann úr fjarlægð ganga eftir ströndinni með víðfermt hafið í baksýn.



Úr sömu fjarlægð krem ég byggingakrana milli fingranna á mér.

Ég er stór - allt fyrir utan gluggann er lítið.
Sjálfhverfa mannsins í hnotskurn.





Ég vek athygli lesenda á útgáfu ljóðabókar minnar "Maðurinn í hnotskurn"
Höfundur les upp úr verkum sínum í Máli og Menningu á sunnudaginn kemur kl.20
Allir velkomnir.















Mohohoho sjötti apríl :) !!!!!

Þetta er ÓTRÚLEGT!

Þegar maður horfir á þetta veltir maður því fyrir sér hvort dýrin hljóti ekki að vera alveg sömu vitsmunaverur og mennirnir....tala bara annað tungumál.

Kannski ég hætti að drepa flugur...

TOFU vekur mikla gleði í dag

Svona er Ísland lítið land....

Í gær hringdi ég í skattinn til að fá útskýringar varðandi skattaskýrsluna eins og gengur og gerist. Það var nú ekki í frásögu færandi svo sem - nema bara hvað - í þetta sinn fæ ég samband við mann sem í rólegheitunum hlustar á mig og svarar spurningum mínum. Það gengur þó ekki alveg að leysa úr málinu og það endar með að hann fer sjálfur inn í skýrsluna mína á vefnum til að reyna að finna út úr hlutunum. - Í sjálfu sér er þetta góða viðmót eitt og sér í frásögu færandi miðað við sum önnur símtöl sem ég hef átt við skattinn í gegnum tíðina - EN það var nú ekki það sem ég ætlaði að segja ykkur frá HELDUR það að þegar maðurinn sá hinn sami sér skýrsluna mína segir hann "Já átt þú Hverfisgötuna?" Já, segi ég. Haldiði þá að komi ekki bara í ljós að þessi ókunni maður sem var að hjálpa mér við að telja fram til skatts í gegnum símann hafi búið í íbúðinni minni, fimmtu hæð til vinstri, áður en ég fæddist! Haldiði ekki bara að afi hans og amma hafi byggt húsið og hann sofið undir súðinni í eldhúsinu mínu með konunni sinni til nokkurra ára á meðan ég var ekki einu sinni komin í hönnun. Þetta fannst okkur nú skemmtileg tilviljun og fékk ég að heyra nokkrar góðar sögur af húsinu og hvernig það hafi reynst að sofa undir súðinni góðu. Hann bað að heilsa góðu öndunum í húsinu. Og ég skilaði því.

Kaffi kaffi kaffi


Kaffi bjargar deginum.

Hvernig stendur á því að manni er alltaf kallt á morgnana? Alveg fram eftir öllu bara. Þá er gott að fá kaffi í kroppinn. Kaffi í kroppinn.

Kaffi kaffi kaffi.

List dagsins

List dagsins er málaralist Gustavs Klimt. Um hann má fræðast á wikipedia og einnig á sérlega skemmtilegri síðu sem heitir iKlimt.

Listunnendur eru hvattir til að líta á verk Klimts enda undurfögur - viðkvæmar sálir ættu þó að varast klámfengnar teikningar hans.

Ég heillaðist af mynd Klimts, Kossinum, þegar ég var á ferð í Vínarborg í fyrra og festi kaup á eftirprentun af því. Plakatið bíður þó enn innrömmunar og upphengingar vegna framtaksleysis míns. Fyrir skömmu viltist ég inn í búðina Hitt hornið - ef ég man nafnið rétt - sem er á horni Laugarvegs og Snorrabrautar, lítil og skrítin búð með furðulegri samsetningu plakata, ramma, ullarvara og jólaskrauts á tilboði. Þar fann ég nokkrar myndir eftir Klimt ýmist á póstkortum eða plakötum og mundi þá eftir óinnrömmuðu myndinni minni og aðdáun minni á list Gustavs Klimt. Svo nú deili ég henni með ykkur lesendur góðir. Myndin hér til hliðar heitir Judith og höfuð Holofernes - ekki veit ég nú hver þessi Holofernes er en Judith er tignarleg.

Næst þegar þið komið í heimsókn fáið þið ef til vill að berja Kossinn augum í stofunni hjá mér.

Hver veit.

Fantasía konu sem lifir einföldu lífi

Það er ekki eðlilegt hvað ég fantasera mikið um að prjóna...

...svona miðað við hvað ég prjóna í rauninni lítið og kann svo sem ekkert mikið meira en þetta gamla góða - slétt og brugðið.


Þegar ég verð stór ætla ég að verða heimsins besta prjónakona!

Skemmtileg hugleiðing um lokaritgerðir

Ég var að uppgötva skemmtilega staðreynd um lokaritgerðasmíð mína.
Það er sama í hvaða kafla ég er að vinna þá stundina - mér finnst alltaf sá hinn sami kafli hljóta að vera mikilvægasti kaflinn í verkinu, alveg hreint undirstöðuatriði að þessi kafli sé góður, verkið í heild stendur og fellur með því að methodology kaflinn sé fullkominn, að intro kaflinn sé óaðfinnanlegur, að case kaflinn sé smart, að skilgreiningarnar séu vel úr garði gerðar og svo framvegis. Alltaf skal þessi eini kafli sem er fyrir sjónum mínum hverja stund vera sá allra allra mikilvægasti.

Niðurstaða A: Ég hlýt að vera að gera eitthvað voða voða mikilvægt á hverjum degi!

Niðurstaða B: Ég gæti mögulega verið með vott af fullkomnunaráráttu!

Niðurstaða C: Það er gaman að gera lokaritgerð! (ef þú trúir því nógu mikið þá er það satt! :)

Orð

Dúddamía!
Það er ekkert endilegt
Ojjj en ógó
Þetta er nú ekki mjög dannað

Hér sjáið þið nokkur orð sem eru mér töm í daglegu tali. Ég hef hins vegar, í gegnum tíðina, fengið þær athugasemdir frá hinum og þessum aðilum sem vilja meina að þetta séu beinlínis ekki orð.

Það finnst mér frásinna.

Mig langar til að prjóna þennan jakka næst. Já eða svona peysu
eða jafnvel svona pils. Möguleikarnir eru endalausir....endalausir....endalausir......endalausir möguleikar til að prjóna.

Best að halda áfram að læra.

Tónlist

Þegar ég sit og læri finnst mér gott að hlusta á notalega og skemmtilega tónlist - tónlist sem er laus við þungan trommutakt og diskófjör - tónlist sem er í senn falleg, skemmtileg, flott og þægileg.

Nú er ég búin að hlusta á sömu lögin aðeins of oft og vantar nýja tónlist á ipodinn minn góða.

En það er erfitt að uppgötva nýja tónlist án þess að vera bent á hana.

Lumar þú á góðri tónlist?

Hver er uppháldstónlistarmaðurinn þinn?

Hver er uppáhalds-notalega-tónlistin þín?

Svör óskast!

Pönk

Tékkið á þessu:

Pönklaga samkeppni Þjóðleikhússins og Rásar2

Ég kaus Vafasama Síðmótun og hlakka til að fá miða í verðlaun...vonandi!

Fýla - Bros - og vonandi aftur Fýla!

Ég hefði getað GUBBAÐ - horfandi á sigurogsjálfsánægjuglottin á sjálfstæðisfólkinu í gær þegar nýr meirihluti í borginni var tilkynntur. Fýlusvipurinn á þeim hinum sömu fyrir ekki svo löngu var mér eitthvað svo í fersku minni að ég gat ómögulega samglaðst þeim og trúað að þau væru þarna einungis með hagsmuni borgarbúa í huga. Nei, það var valdagræðgi sem skein úr þessum andlitum.

Núna eru jólin alveg að verða búin - eru eiginlega bara búin fyrst það er kominn hversdagur á ný - og Hlöðver fer að lalla sér inn í skúffu á ný.


Mér lærðist það fimm mínútur í kaffiboð á afmælisdaginn minn að svunta er ekki 100% seif vörn - bara 99,9% - eins gott að taka subbupilluna líka næst þegar þeyta á rjóma.



Bósi Ljósár þakkar samfylgdina á árinu sem er að líða og óskar ykkur öllum gleðilegs nýs árs - ársins 2008 - árið sem munað verður eftir!



Yfir og út